Wasaaradda Ganacsiga iyo Warshadaha ee Dowladda Federaalka Soomaaliya ayaa maanta qabatay kulan muhiim ah oo lagu ansixinayay Siyaasadda iyo Sharciga Iskaashatooyinka Qaranka (Validation Meeting for National Cooperatives Policy and Law). Kulankan ayaa waxaa ka soo qaybgalay wakiillo ka socday hay’adaha dowladda, Dowlad Goboleedyada, ganacsatada gaarka loo leeyahay, iyo iskaashatooyinka kala duwan ee dalka.
Kulanka ayaa diiradda lagu saaray muhiimadda ay leedahay dhismaha hannaan sharciyeed iyo siyaasadeed oo casri ah, kaas oo taageeraya horumarinta iyo xoojinta waaxda iskaashatooyinka Soomaaliya. Intii uu socday kulanka, waxaa si faahfaahsan loo soo bandhigay qodobada muhiimka ah ee Siyaasadda iyo Sharciga Iskaashatooyinka Qaranka, iyadoo lagu muujiyay kaalinta ay iskaashatooyinku ka qaadan karaan kobcinta dhaqaalaha dalka iyo horumarinta bulshada Soomaaliyeed.
Mas’uuliyiinta Wasaaradda ayaa tilmaamay in siyaasaddan iyo sharcigan cusub ay gacan weyn ka geysan doonaan casriyeynta nidaamka iskaashatooyinka, kor u qaadista wada-shaqeynta bulshada, iyo abuurista fursado dhaqaale oo ballaaran. Waxaa sidoo kale la carrabka ku adkeeyay in iskaashatooyinka ay muhiim u yihiin xoojinta wax-soo-saarka gudaha, taageeridda ganacsiyada yaryar iyo kuwa dhexdhexaadka ah, iyo horumarinta dhaqaalaha bulshada ku dhisan.
Wasaaraddu waxay xaqiijisay sida ay uga go’an tahay dardargelinta hannaanka sharciyeed ee harsan, iyadoo sheegtay inay Siyaasadda iyo Sharciga Iskaashatooyinka Qaranka u gudbin doonto Golaha Wasiirrada ee Xukuumadda Federaalka Soomaaliya si loo ansixiyo sida ugu dhakhsaha badan.
Ka qaybgalayaasha kulanka ayaa si weyn u bogaadiyay dadaalka iyo hoggaaminta Wasaaradda Ganacsiga iyo Warshadaha ee geeddi-socodkan muhiimka ah. Waxay sidoo kale carrabka ku adkeeyeen baahida loo qabo qaab-dhismeed sharci oo mideysan oo hagaya howlaha iskaashatooyinka dalka, si loo helo nidaam hufan oo waxtar leh.
Dhanka kale, iskaashatooyinka Soomaaliyeed ee kulanka ka qaybgalay ayaa door muuqda ka qaatay doodaha iyo talooyinka la xiriira siyaasadda iyo sharciga cusub. Waxay muujiyeen sida ay uga go’an tahay inay ka qaybqaataan horumarinta nidaamka iskaashatooyinka, laga soo bilaabo marxaladihii hore ee la-tashiyada ilaa heerka ansixinta.
Kulanka waxaa si rasmi ah u furay una soo xiray Maxamed Cabdullaahi Maxamed, Agaasimaha Waaxda Ganacsiga Yaryar, Dhexdhexaadka iyo Iskaashatooyinka ee Wasaaradda Ganacsiga iyo Warshadaha. Agaasimaha ayaa ku ammaanay dhammaan dhinacyadii ka qaybqaatay diyaarinta siyaasaddan iyo sharcigan, isaga oo xusay in ay yihiin tallaabo muhiim ah oo lagu horumarinayo iskaashatooyinka iyo dhaqaalaha dalka guud ahaan.
Kulankan ayaa loo arkaa mid muhiim u ah dhismaha nidaam iskaashato oo casri ah, kaas oo awood u siin kara bulshada Soomaaliyeed inay si wadajir ah uga faa’iideystaan fursadaha dhaqaale iyo horumarineed ee dalka.
