Muqdisho, Soomaaliya — Wafdi ganacsi oo ka socda Jamhuuriyadda Shacabka Shiinaha ayaa maanta soo gaaray magaalada Muqdisho, si ay uga qeybqaataan Shirweynaha Xiriirinta Ganacsiga Soomaaliya iyo Shiinaha, oo berri ka furmaya Muqdisho.
Wafdiga ayaa waxaa Garoonka Caalamiga ah ee Aadan Cadde ku soo dhaweeyay Safiirka Soomaaliya ee Shiinaha, Marwo Danjire Hodhan Osman Abdi, iyadoo ay goob-joog ka ahaayeen masuuliyiin ka tirsan Wasaaradda Ganacsiga iyo Warshadaha Dowladda Federaalka Soomaaliya.
Booqashada wafdigan ayaa qayb ka ah dadaallada lagu xoojinayo xiriirka ganacsi iyo maalgashi ee Soomaaliya iyo Shiinaha, iyadoo shirweynuhu fursad u noqon doono labada dhinac inay si toos ah uga wada hadlaan fursadaha iskaashi ee jira iyo meelaha cusub ee ganacsi iyo maalgashi laga abuuri karo.
Shirweynaha Xiriirinta Ganacsiga Soomaaliya iyo Shiinaha
Shirweynaha ayaa isu keeni doona ganacsatada, maalgashadayaasha, shirkadaha iyo wakiillada dowladda ee Soomaaliya iyo Shiinaha, iyadoo ujeeddadu tahay in la abuuro madal ay labada dhinac si toos ah ugu kulmaan, iskuna dhaafsadaan fursadaha ganacsi iyo maalgashi.
Kulamada iyo wada-hadallada ka dhacaya shirweynaha ayaa diiradda lagu saari doonaa sidii loo xoojin lahaa iskaashiga ganacsi, loo fududeyn lahaa xiriirka u dhexeeya shirkadaha labada dal, loona abuuri lahaa fursado cusub oo ganacsi iyo maalgashi.
Sidoo kale, shirweynuhu wuxuu fursad siin doonaa ganacsatada Soomaaliyeed inay soo bandhigaan awoodda wax-soo-saarka gudaha, badeecooyinka dalka iyo fursadaha maalgashi ee ka jira Soomaaliya, halka dhinaca Shiinahana ay fursad u heli doonaan inay si dhow u bartaan suuqa Soomaaliya iyo qaybaha kala duwan ee dhaqaalaha dalka.
Xoojinta Xiriirka Ganacsi ee Labada Dal
Wasaaradda Ganacsiga iyo Warshadaha ayaa muhiimad gaar ah siinaysa kobcinta xiriirrada ganacsi ee Soomaaliya iyo suuqyada caalamka, iyadoo xoogga la saarayo fududeynta xiriirka ganacsatada, dhiirrigelinta maalgashiga iyo abuurista iskaashi waara oo labada dhinacba faa’iido u leh.
Soo gaaritaanka wafdiga ganacsi ee Shiinaha ayaa calaamad u ah sii xoojinta xiriirka dhaqaale ee labada dal, waxaana la filayaa in shirweynuhu abuuro xiriirro ganacsi oo toos ah, iskaashi cusub iyo fursado maalgashi oo u dhexeeya ganacsatada iyo shirkadaha Soomaaliya iyo Shiinaha.
Shirweynaha Xiriirinta Ganacsiga Soomaaliya iyo Shiinaha ayaa berri ka furmaya magaalada Muqdisho, waxaana ka qeybgalaya dhinacyada muhiimka ah ee ganacsiga, maalgashiga iyo horumarinta dhaqaalaha ee labada dal.
