Muqdisho, Soomaaliya — Waxaa maanta Wasaaradda Ganacsiga iyo Warshadaha Dowladda Federaalka Soomaaliya ka dhacday munaasabad rasmi ah oo xil-wareejin ah, taas oo Wasiir-ku-xigeenkii hore ee Wasaaradda, Mudane Maxamuud Cabdullaahi Axmed (Abukaate), uu xilka si rasmi ah ugu wareejiyay Wasiir-ku-xigeenka cusub ee Wasaaradda, Mudane Cismaan Maxamed Cabdi (Cismaan Daalo).
Munaasabadda xil-wareejinta waxaa guddoomiyay Wasiirka Ganacsiga iyo Warshadaha XFS, Mudane Gamal Maxamed Xasan, waxaana ka qeyb galay Wasiiru-dowlaha Wasaaradda, Mudane Maxamed Nuur Abubakar Sharif, Agaasimaha Guud ee Wasaaradda, Mudane Ibrahim Cismaan, iyo madax iyo mas’uuliyiin ka socday hay’adaha iyo dhinacyada ay Wasaaraddu wada shaqeynta la leedahay.
Waxaa sidoo kale munaasabadda ka qeyb galay xubno ka tirsan Rugta Ganacsiga iyo Warshadaha Soomaaliyeed, Hay’adda Taya-dhowrka Soomaaliyeed, xildhibaanno, howlwadeennada Wasaaradda iyo mas’uuliyiin kale.
Xil-wareejinta Wasiir-ku-xigeenka
Munaasabadda ayaa si rasmi ah loogu kala wareejiyay xilka Wasiir-ku-xigeenka Wasaaradda, iyadoo Mudane Maxamuud Cabdullaahi Axmed (Abukaate) uu xilka ku wareejiyay Mudane Cismaan Maxamed Cabdi (Cismaan Daalo).
Xil-wareejintan ayaa qeyb ka ah hannaanka maamulka iyo sii-socodka shaqada Wasaaradda, iyadoo mas’uulka cusub uu si rasmi ah ula wareegay waajibaadka iyo masuuliyadaha la xiriira xilka loo igmaday.
Wasiirka oo Mahadcelin iyo Hambalyo Jeediyay
Wasiirka Ganacsiga iyo Warshadaha, Mudane Gamal Maxamed Xasan, ayaa uga mahadceliyay Wasiir-ku-xigeenkii hore, Mudane Maxamuud Cabdullaahi Axmed (Abukaate), dadaalkii iyo adeegii uu muddadii uu xilka hayay ugu adeegay Wasaaradda.
Wasiirka ayaa sidoo kale hambalyo iyo bogaadin u diray Wasiir-ku-xigeenka cusub, Mudane Cismaan Maxamed Cabdi (Cismaan Daalo), isagoo u rajeeyay guul iyo in uu si hufan uga soo baxo waajibaadka loo igmaday.
Wasiirku wuxuu xusay muhiimadda ay leedahay sii wadidda howlaha Wasaaradda iyo wada-shaqeynta dhammaan qeybaha kala duwan, si loo xaqiijiyo in waajibaadka Wasaaradda si hufan loo guto.
Sii-socodka Howlaha Wasaaradda
Munaasabadda xil-wareejinta ayaa sidoo kale muujisay muhiimadda ay leedahay sii-socodka howlaha iyo adeegyada Wasaaradda Ganacsiga iyo Warshadaha, iyadoo mas’uuliyiinta cusub ay qaadanayaan masuuliyadaha loo igmaday.
Wasaaradda Ganacsiga iyo Warshadaha waxay sii wadi doontaa gudashada waajibaadkeeda, hirgelinta qorshayaasheeda iyo xoojinta wada-shaqeynta hay’adaha dowladda, ganacsatada iyo dhammaan daneeyayaasha ku lugta leh horumarinta ganacsiga iyo warshadaha Soomaaliya.
